Thursday, February 14, 2019

პროგრამა „მომავლის თაობის“ შემაჯამებელი ღონისძება ქვემო ქართლში


14 თებერვალს  მარნეულის დემოკრატიული ჩართულობის ცენტრში შეაჯამეს  ქვემო ქართლის რეგიონში პროგრამის პარტნიორი სკოლების მიერ გასულ სემესტრში გაწეული  მუშაობა. სკოლის მოსწავლეების მიერ წარმოდგენილი პრეზენტაციები ეხებოდა გარემოსდაცვით, არჩევნებისადმი მოქალაქის დამოკიდებულების, ადგილობრივ თვითმმართველობასთან თანამშრომლობის, ჯანსაღი ცხოვრების წესის, ჯანსაღი კვების, სკოლის გარემოს გაუმჯობესების, ინტეგრაციის, ადამიანის უფლებების, ადრეული ქორწინების თემებს, სოციალურად დაუცველი ოჯახებისთვის გაწეულ საქმიანობას.
თამუნა ფრუიძემ, პროგრამა „მომავლის თაობის“ რეგიონული ქსელების მენეჯერმა და ინგა პაიჭაძემ, სიქა-საგანმანათლებლო ინიციატივების ქართული ასოციაციის აღმასრულებელმა დირექტორმა, პროგრამის მიმართულებებსა და საქმიანობის შედეგებზე ისაუბრეს.
წარმატებული საკლუბო/საკლასო პროექტების განხორციელებისთვის ტექნიკით დაჯილდოვდნენ ქვემო ქართლის რეგიონის 4 სკოლა და სამოქალაქო განათლების 3 პედაგოგი. ლეპტოპები გადაეცათ წალკის #2, წალკის მუნიციპალიტეტის სოფელ გათიადის, მარნეულის მუნიციპალიტეტის სოფელ ბაიდარის და თეთრიწყაროს მუნიციპალიტეტის სოფელ წინწყაროს საჯარო სკოლებს, ხოლო სამოქალაქო განათლების პედაგოგებს: დიანა აროსიანს, მარნეულის მუნიციპალიტეტის სოფელ წერეთლის საჯარო სკოლა, მაკა მოსახლიშვილს, რუსთავის #3 საჯარო სკოლა, და გოჰარ განდილიანს, წალკის მუნიციპალიტეტის სოფელ დარაქოვის საჯარო სკოლა, წარმატებული პედაგოგიური საქმიანობისთვის გადაეცათ პლანშეტები.
ღონისძიებას დაესწრნენ რუსთავის #3, მარნეულის, ბოლნისის, დმანისის, წალკის და თეთრიწყაროს მუნიციპალიტეტების საჯარო სკოლების მოსწავლეები და სამოქალაქო განათლების პედაგოგები, მარნეულის რესურსცენტრისა და საქართველოს სახალხო დამცველის აპარატის ქვემო ქართლის ოფისის წარმომადგენლები. ფოტოალბომი

Monday, February 11, 2019

"ჯანსაღი ცხოვრება"

რუსთავის #3 საჯარო სკოლის სამოქალაქო კლუბმა განახორციელა საკლუბო პროექტი "ჯანსაღი ცხოვრება". კლუბის წევრებმა იკვლიეს, თუ რას მიიჩნევდნენ მოსწავლეები ჯანსაღ ცხოვრებად. აღმოჩნდა, რომ ზოგისთვის ეს იყო ვარჯიში, სწორი კვება, ზოგისთვის გონების აქტიური მუშაობა, 7-9 საათი ძილი ან პერიოდულად ტკბილეულის ზომიერად მიღება, ასევე ემოციური განტვირთვა. გამოკითხვის ჩატარების შემდეგ კლუბის წევრებმა  მოამზადეს ბუკლეტები ჯანსაღი ცხოვრების წესზე, დაარიგეს სკოლაში მოსწავლეებს, რითაც მოახდინეს ცოდნის გაზიარება. 

Thursday, February 7, 2019

გამოვლინდნენ ტექნიკის კონკურსში გამარჯვებული სკოლები და პედაგოგები

გამოვლინდნენ პროგრამის "მომავლის თაობა" ფარგლებში PH International-ის მიერ გამოცხადებული ტექნიკის კონკურსში გამარჯვებული სკოლები და სამოქალაქო განათლების პედაგოგები.
პროგრამაში ჩართული ქვემო ქართლის რეგიონის 33 სკოლიდან კონკურსში მონაწილეობა მიიღო 9 სკოლამ და სამოქალაქო განათლების 9 პედაგოგმა. მათგან ტექნიკის კონკურსში გამარჯვება მოიპოვა 4 საჯარო სკოლამ და სამოქალაქო განათლების 3 პედაგოგმა. ესენია:
სკოლები:
  1. სსიპ მარნეულის მუნიციპალიტეტის სოფელ ბაიდარის საჯარო სკოლა
  2. სსიპ წალკის #2 საჯარო სკოლა
  3. სსიპ წალკის მუნიციპალიტეტის სოფელ განთიადის საჯარო სკოლა
  4. სსიპ თეთრიწყაროს მუნიციპალიტეტის სოფელ წინწყაროს საჯარო სკოლა
სამოქალაქო განათლების პედაგოგები:
  1. დიანა აროსიანი - მარნეულის მუნიციპალიტეტის სოფელ წერეთლის საჯარო სკოლა
  2. მაკა მოსახლიშვილი - რუსთავის #3 საჯარო სკოლა
  3. გოჰარ განდილიან - წალკის მუნიციპალიტეტის სოფელ დარაქოვის საჯარო სკოლა

ვულოცავთ გამარჯვებულებს და ვუსურვებთ შემდგომ წარმატებებს!

Monday, February 4, 2019

საკლასო პროექტი "სოციალური ქსელის დადებითი და უარყოფითი მხარეები"

რუსთავის #3 საჯარო სკოლის Xბ კლასმა განახორციელა საკლასო პროექტი "სოციალური ქსელის დადებითი და უარყოფითი მხარეები". სამოქალაქო განათლების გაკვეთილზე გაიმართა დებატები თემასთან დაკავშირებით. მოსწავლეები აქტიურად გამოხატავდნენ თავის მოსაზრებას, გამოიკვეთა საკმაოდ განსხვავებული შეხედულებები, უმეტესობა აღიარებდა, რომ სოციალური ქსელის გამოყენება საჭიროა და მას დადებითი შედეგი მოაქვს. ხოლო მეორე ნაწილი საწინააღმდეგოს ამტკიცებდა და მოჰყავდა უარყოფითი შედეგების მაგალითები, რამაც ადამიანების სიცოცხლე შეიწირა. საინტერესო დებატების შედეგად მოსწავლეები შეთანხმდნენ, რომ მეტი სიფრთხილე, გონიერება და ზომიერებაა საჭირო სოციალური ქსელის გამოყენებისას. 

Friday, January 11, 2019

საახალწლო საქველმოქმედო აქცია „თანადგომა“


მარნეულის მუნიციპალიტეტის სოფელ თამარისის #1 საჯარო სკოლის სამოქალაქო კლუბმა საახალწლოდ განახორციელა საახალწლო საქველმოქმედო აქცია „თანადგომა“.
კლუბის წევრებმა თვითონ დაამზადეს საკონდიტრო ნაწარმი და სკოლაში მოაწყვეს საქველმოქმედო ბაზრობა, სადაც გაყიდეს თავიანთი პროდუქტები. მიღებული თანხით შეიძინეს საკვები პროდუქტები, ტკბილეული, ხილი,  ხელნაკეთ საახალწლო მისალოც ბარათებთან ერთად დაურიგეს სოფლის სოციალურად დაუცველ მოსახლეობას  და მიულოცეს ახალი წელი. ბენეფიციარებმა დიდი მადლობა გადაუხადეს მოსწავლეებს გაწეული ყურადღებისა და სითბოსთვის. კლუბი მომავალშიც გეგმავს მსგავსი აქციების გამართვას.


Friday, January 4, 2019

მცირე საგრანტო პროექტის "ჩემი საყვარელი სივრცის" მიმდინარეობა

დმანისის მუნიციპალიტეტის სოფელ ირგანჩაის საჯარო სკოლის მე-10 კლასი ახორციელებს მცირე საგრანტო პროექტს "ჩემი საყვარელი სივრცე". პროექტის ფარგლებში დეკემბრის თვეში განახორციელეს შემდეგი აქტივობები: 

  • მოსწავლეებმა მოამზადეს და წარმოადგინეს პრეზენტაციები ქართველ და აზერბაიჯანელ მწერლებზე, ილია ჭავჭავაძესა და მირზა ფათალი ახუნდოვზე. აზერბაიჯანელი მწერლის ნაწარმოებების ქართული თარგმანი და სხვა აზერბაიჯანული ლიტერატურა მოსწავლეებს მიაწოდა აზერბაიჯანელთა კონგრესის თავჯდომარემ ბატონმა ალი ბაბაევმა. მოსწავლეები გაეცნენ მის ნაწარმოებებს.
  • პროექტის ფარგლებში სკოლის დირექციამ გამოყო ფართი საკითხველოს მოსაწყობად, რომელიც მოსწავლეებმა მოაწესრიგეს.  სამკითხველო ოთახის რემონტის თხოვნით მე-10 კლასის მოსწავლეებმა წერილობით მიმართეს დმანისის მერიას, რაზეც დადებითი პასუხი მიიღეს. დმანისის მუნიციპალიტეტის მერია მოსწავლეებს დაპირდა, რომ რემონტი განხორციელდება მერიის 2019 წლის ბიუჯეტით. 
  • გრანტით შეძენილი თანხით შეძენილი იქნა ინვენტარი, საკანცელარიო ნივთები და ქართული მხატვრული ლიტერატურა.
  • კლასმა შეიმუშავა და თვალსაჩინო ადგილას გამოაკრა კონკურსის "ვინ უფრო კარგად კითხულობს ქართულად" დებულება, დადგინდა მონაწილეთა სია, ჩატარდა კონკურსი და გამოვლინდნენ გამარჯვებულები. გამარჯებულებს პროექტის შემაჯამებელ ღონისძიებაზე გადაეცემათ პრიზად ქართული მხატვრული ლიტერატურა.
  • მოსწავლეებმა მოამზადეს ინსცენირება "კუკარაჩადან", რომელიც წარმოდგენილი იქნება ნარკოტიკებისა და თამბაქოს მავნებლობის შესახებ სადისკუსიო  ღონისძიებაზე. ამავე ღონისძიებაზე  მოწვეული იქნება საპატიო სტუმარი საქართველოს პარლამენტის ეროვნული ბიბლიოთეკის გენერალური დირექტორი გიორგი კეკელიძე. ღონისძიება გაიმართება 2019 წლის იანვრის ბოლოს.

ადამიანის უფლებების დაცვის კვირეული განთიადის საჯარო სკოლაში


დმანისის მუნიციპალიტეტის სოფელ განთიადის საჯარო სკოლის სამოქალაქო კლუბმა ადამიანის უფლებების საერთაშორისო დღესთან დაკავშირებით სკოლაში მოაწყო კვირეული. კვირეულის ფარგლებში კლუბის წევრებმა მოამზადეს და სემინარი ჩაუტარეს უმცროსკლასელებს, რომელზეც გააცნეს ადამიანის უფლებების დეკლარაციის ისტორია და დეკლარაციის მუხლები, მოამზადეს თემატური კედლის გაზეთი და გამოაკრეს სკოლის ფოიეში, დაამზადეს საინფორმაციო ფურცლები და გაავრცელეს სკოლასა და თემში.